Ռուբեն Մարտիրոսյան.Ընտրակաշառք բաժանելու համար կա փող, զենք գնելու համար փող չկա

Խաղաղության երկխոսություն ՀԿ -ի փորձագետ իրավապաշտպան Ռուբեն Մարտիրոսյանի հետ զրուցեցինք հետպատերազմյան գործընթացների մասին, ինչպես նաև բանակում տիրող բարքերի մասին: Այն խնդիրները, որոնք տարիներ շարունակ բարձրաձայնել են իրավապաշտպանները, այն բոլոր սպանության չբացահայտված գործերը, անարդարության մթնոլորտը այս տարիների ընթացքում նպաստել են երկրի պաշտպանական կողմի թուլացմանը: Ռուբեն Մարտիրոսյանը նշում է."Ընտրակաշառք բաժանելու համար կա փող, զենք գնելու համար փող չկա՞: Մեզ համար անսպասելի էր, չկարողացանք ճիշտ ժամանակին հակահարված տալ: Իսկ որտե՞ղ էր ՀՀ պետանվտանգության ռազմական հակահետախուզությունը և հետախուզությունը, ինչո՞վ էր զբաղված: Պատերազմից առաջ մենք անընդմեջ լսում էինք սպեկուլիատիվ հայտարարություններ այն մասին, որ մի մոռացեք մենք պատերազմի մեջ գտնվող ժողովուրդ ենք, մենք անպարտելի բանակ ունենք, այդ իսկ պատճառով թշնամին չի համարձակվում հարձակվել մեզ վրա": Հնացած զենքերի թեմայով Ռուբեն Մարտիրոսյանը պատմեց մի պատմություն:1999 թվականին ՊՆ-ի տարբեր զորամասերից ժամկետանց զենք է դուրս բերվել: Այդ զենքը վաճառվել է տասնապատիկ ցածր գնով: Ռուբեն Մարտիրոսյանը ընդգծեց. "Ընդդիմադիր Գագիկ Ջահանգիրյանը պատասխան պիտի տա, թե ինչու՞ էտ զենքի վաճառքը գլխավորող գեներալները պատասխանատվության չենթարկվեցին: Պատերազմի վերսկսման դեպքում գոյություն ունի առաջնահերթ գործողությունների մարտական պլան , ինչու՞ այդ պլանը չի գործել, ովքեր են այդ պլանի պատասխանատուները, եթե չի գործել, ապա ովքե՞ր են այդ պլանը կազմել, նրանք պետք է պատժվեն, դա րոպե առ րոպե հաստատված պլան է: Իրավապաշտպանը նաև կարևոր հարցադրում արեց. "Ադրբեջանցին հային սպանում է իշխանությունները մեծ աղմուկ են բարձրացնում ամբողջ աշխարհով մեկ, բայց երբ հայն է հային սպանում, քար լռություն է, ոչ մի ձայն: Մինչև քառօրյա պատերազմը՝ ապրիլի 2-ը մենք ունեինք 18 զոհ, իսկ այս քառօրյա պատերազմից հետո 15 օրերի ընթացքում մենք տվեցինք 12 զոհ, սրանք այն դեպքերն են, որոնք չեն բացահայտվել, դրանք ոչ մարտական զոհեր են:Պատերազմը վեր է հանել այն ներքին խնդիրները, որոնք առկա են զորամասերում, այն ատելությունը, որը կա զորամասերում: Զավեշտալին այն է, մինչև այս տարվա սկիզբը կոռումպացված դատաքննական մարմինը նենգափոխելով փաստերը ներկայացնում է որպես ինքնասպանությունները, իսկ հիմա այս դեպքերը անվանում է զենքի հետ անզգույշ վարվելու արդյունք: Դրանից չի փոխվում այն փաստը, որ զինվորին սպանել են, ուզում եք գրեք ինքնասպանություն, թե զենքի հետ անզգույշ վարվելու արդյունք մեկը դրանից սպանությունը չի փոխվում: Թեհմինե Ենոքյան