Կամավորները պատրաստ են Ժ․ Սէֆիլյանի հրամանատարությամբ ազատագրելու տարածքները․ Պավել Մանուկյան

2016 թ. հունիսի 17-ին տեղի ունեցավ Ժիրայր Սէֆիլյանի գլխավորած «Շուշիի առանձնակի գումարտակի ազատավարտիկների միավորում» ՀԿ-ի կոչով մեկնարկած կամավորագրման գործընթացի կազմակերպական ընթացքին և արդյունքներին նվիրված մամլո ասուլիս: Բանախոսներն էին՝ կամավորագրման նախաձեռնության անդամներ Պավել Մանուկյանը Արայիկ Խանդոյանը Սուրեն Կարապետյանը Գագիկ Արծրունին, Աշոտ Մարգարյանը և Վահրամ Սերոբյանը: Բանախոսները հայտարարեցին, որ կամավորագրվածների քանակը և կազմը բավարար են մեկ լիարժեք գումարտակից ավելի մեծ ստորաբաժանում ձևավորելու և Արցախի կորցրած տարածքներն ազատագրելու նպատակով մարտական առաջադրանք կատարելու համար: Տարբեր տեսանկյուններից դիտարկելով Արցախի և հայկական պետականության վրա դամոկլյան սրի նման կախված գոյութենական սպառնալիքը, նրանք ընդգծեցին, որ ստեղծված իրավիճակն ուղղակի աննախադեպ է, որովհետև ժողովուրդը և բանակը պատրաստ են դիմակայելու ցեղասպանության վտանգին, սակայն իշխանությունները թույլ չեն տալիս, ինչը ակամա հուշում է մեր ազգի և պետականության դեմ կազմակերպված դավադրության մասին: Բանախոսները նաև ներկայացրեցին համայն հայության՝ որպես Ազգ-Բանակ կազմավորվելու և հակառակորդին ծնկի բերելու միջոցով այդ գոյութենական սպառնալիքը չեզոքացնելու վերաբերյալ իրենց մոտեցումները: Նախաձեռնության անդամները դիմեցին ՊՆ-ին, նշելով որ կամավորները պատրաստ են ազատագրելու տարածքները և ակնկալում են ՊՆ-ի աջակցությունը՝ իրենց առաքելությունն իրականացնելու համար: Կամավորագրումը շարունակվում է: Ցանկություն ունեցողները կարող են գրանցվել այս հղումով. https://docs.google.com/forms/d/1FEmeK7jH2FLgSscJriflEJkNpWe4VQJmXs0bFLWR6hk/viewform?c=0&w=1