Ырайымдуу, Мээримдүү Жаратуучунун аты менен!

3- күн
"АЛЛАХТЫ ЭСТӨӨ"
Аят: Аллахты даңктап эстөөдөн (зикирден), намаз окуудан, зекет берүүдөн соода-сатык да, күнүмдүк тиричилик да аласыта албай турган адамдар бар. Алар жүрөктөн үшүн алып, көздү алайта турган күндөе (б.а. , кымат күнүнөн) коркушат (Нур: 37).Хадис: Ушундай бир сөздөр бар, ким ошол сөздөрдү жамаатта отурган жеринен турбай туруп үч жолу кайталса, күнөөлөрүнөн арылат. Ал эми кимде-ким аларды кайырлуу, зикир кылынган жамаат менен олтурган кезде кайталаса, жазууларга урулган мөөр сымал ошол сөздөр ошол жамаатка мөөр болуп басылат. Ал сөздөр төмөнкүчө: "Оо, Жараткан Аллах! Сени даңктоо менен (ар түрдүү кемчиликтерден ) аруулайм. Сенден башка эч бир кудай жок. Сенден күнөөлөрүмдү кечирүүңдү сурайм жана сага тообо кылам " (Ибн Амрдан, Абу Дауд).
Окуя: Койчунун Аллахка шүгүр келтириши.
Күндөрдүн биринде карапайым бир койчу Жаратканга шүгүр келтирип, өзүнүн аң-түшүнүгүнө жараша:
- Оо, Жараткан! Кай жерде болсоң да, менден сура! Кааласаң сага койлорумдун жылуу, даамдуу сүтүнөн саап берейин... Жаткың келсе, жаздыгымды берейин... - деп кайрылып жаткан болот.
Койчунун бул сөздөрүн угуп калган азирети Муса пайгамбар ачуусу келип:
- Сен эмне деп жатасың?! Аллах сүт ичкендей, же уктагандай адам бекен?! Аллах Таала бардык кемчиликтерден аруу! Ал эч кимге жана эч нерсеге муктаж эмес! Экинчи мындай сөздөрдү айтпай жүр!- деп койчуну урушат. Карапайым койчу ыңгайсыз абалда калып, айткан сөздөрүнө абдан өкүнүп, бушайман болот да, эмне кылаарын билбей, дароо ордунан обдула туруп, шашкан бойдон жөнөп кетет.
Аллах Таала ошол замат азирети Мусага:
"Бул жмне кылганың?! Пендем чын жүрөгүнөн колунан келишинче Мага жалынып, Мени эстеп жаткан. Сен аны эмне үчүн уруштуң?! Ал тили менен адепке ылайык сөздөрдү айтканды билбесе дагы, жан дили менен мени эскерип, мага шүгүр келтирип жаткан болчу" - деп эскертүү берет.
Азирети Муса кылган ишине аябай өкүнүп, дароо койчунун аркасынан издеп жөнөйт. Көп өтпөй койчуну таап:
- Сен өз каалаганыңдай Аллахты эскере бер, - деген экен.
УММАТИ МУХАММАД тайпасы. https://ok.ru/ummatimuhammadkg