Қўшни ким? Қўшни — бир пиёла чой. Қўшни — бир ҳовуч туз. Қўшни — “бизда тугаб қолибди, бўлса бериб туринг”. Қўшни — дўст. Қўшни — Сирдош. Қўшни — ҳам кўз, ҳам кўнгил билан қидириладиган яқин. Қўшни — эҳтиёжинг бўлган банда. Қўшни — дарича ортидан туриб узоқ суҳбатлашиш. Қўшни — дардингга малҳам бўлгувчи. Қўшни — “Бу кеча уйда бўлсангиз...” дея йўқлагувчи. Қўшни — дорихона, дори- дармон. Қўшни — сўнгги йўлга кетар чоғинг ортингда қолганлар билан бирга йиғлайдиган. Қўшни — Тасалли, юпанчинг.