ЎЗБЕГИМНИНГ ҚИЗЛАРИДАН ҚЎЙМАСИН

Ибо, ҳаё, метин сабру-тоқати,
Ўзгалардан асл фарқи иффати,
Эгнидаги атлас кўйлак зийнати,
Ўзбегимнинг қизларидан қўймасин.
Тумарисдек тоғ қўйнида миниб от,
Ёвлар кўксин тилка пора этган бот,
Этагидан эл кўкариб кетган зот,
Ўзбегимнинг қизларидан қўймасин.
Туркман элин кезмай маст-у сарсона,
Қалинидан бўлиб қолдим девона,
Сувдек зилол жамоли соф мастона,
Ўзбегимнинг қизларидан қўймасин.
Қозоқ қизлар қовоқларин уйсалар,
Қирғизлари келмай, лекин суйсалар,
Тожиклари ҳазилларга йўйсалар,
Ўзбегимнинг қизларидан қўймасин.
Ҳайратлардан уйғонади чистонлар,
Ифоридан яшнаб кетар бўстонлар,
Китоблардан куртак ёзар достонлар,
Ўзбегимнинг қизларидан қўймасин.
Ҳар йигитнинг асраган кўз қароғи,
Кўнгил торим ёриққина чироғи,
Жилғалардан қайнаб чиққан булоғи,
Ўзбегимнинг қизларидан қўймасин.
Катта ҳовли хонадонлар бекаси,
Ота-она бўлгайсизлар эртаси,
Ширин-шакар фарзандларнинг эгаси,
Ўзбегимнинг қизларидан қўймасин.
Бу ҳам бир сир, айтиб қўйманг тўғрисин,
Синаб кўрдим: ҳиндиси-ю, ўрисин --
Охир топдим қалбинамнинг ўғрисин,
Ўзбегимнинг қизларидан қўймасин!
Элёр ЖЎРАЗОДА