Чу мурге аз кафас,эй дил,чаро ногах бурун гаштй ? Магар мафтуни он чашми пур аз сеҳру фусун гаштӣ? Давидӣ аз паяш бехуд, гаҳе бо сар, гаҳе бо по, Дар охир аз шитоби худ саропо ғарқи хун гаштӣ. Замоне бо сари боло намудӣ сарфарозиҳо, Кунун аз он баландиҳо фитода сарнагун гаштӣ. Чашидӣ аз майи ишқаш, ки гардӣ волаву шайдо, Аз ин як ҷуръа май аммо, чаро масту ҷунун гаштӣ? Гаҳе бишкуфтӣ ҳамчун гул, гаҳе нолидӣ чун булбул, Магар фасли хазон омад, ки бас хору забун гаштӣ? Шудӣ холӣ зи хурсандӣ, шудӣ кам аз фараҳмандӣ, Зи ранҷу ғусса акнун пур, зи дарду ғам фузун гаштӣ. Туро бо сад гунаҳ, эй дил, чаро ман носазо гӯям? Биё, бо чашми худ бингар, ки чун будиву чун гаштӣ!