“НОЧ МУЗЕЯЎ – 2026” У ГЕРМАНАВІЧАХ

«УВАГА!УВАГА!УВАГА! Усталявана сувязь з Сатурнам!» – такімі словамі пачалося інтэрактыўнае касмічнае падарожжа. Госці нашага музея “наведалі” планеты Месяц, Сатурн, Марс, на якіх у сваіх сомнамбулістычных снах “гасцяваў” Язэп Драздовіч. Прыемныя ўражанні пакінула “Ноч музеяў– 2026” у наведвальнікаў, якія завіталі на свята з розных мясцін. Гасцей чакала не толькі захапляльнае падарожжа па космасе Язэпа Драздовіча, але і цудоўная канцэртная праграма. Асаблівы каларыт і святочнасць мерапрыемству надало выступленне самадзейных артыстаў народнага фальклорнага калектыву “Купалінка” Більдзюжскага сельскага клуба. Імпульс руху на танц-арбіце прафесійна задаваў танцор з “Купалінкі”, які пакарыў гледачоў сваёй энергіяй і харызмай. Майстар клас па маляванцы, касмічная віктарына, тэатралізаваныя зорныя вячоркі … Кожны мог знайсці для сябе цікавую лакацыю.
Цёплая, па-сямейнаму душэўная атмасфера, спрыяла добраму настрою і выклікала самыя лепшыя эмоцыі і ўражанні. Да позняга часу ладзіліся экскурсіі.
“У вашага музея ёсць душа!” – такія прыемныя словы давялося супрацоўнікам пачуць ад нашых наведвальнікаў. Нездарма ж ажно з Віцебска прыязджаюць на ўсе нашы імпрэзы дзве жанчыны Антаніна і Ірына, якія ўжо сталі сяброўкамі музея. За апошнія гады яны не прамінулі ніводнага музейнага свята.
Паважаныя наведвальнікі! Супрацоўнікі музея вельмі ўдзячны вам за цікавасць да гісторыі шаркаўшчынскага краю і падтрымку нашага музея.