Ey do'stlarim diydor qadrini
Musofirda yurgandan so'rang
Sog'inch dardi, kutish sabrini
Mashaqqat-la yengiydi arang
Kulganiga ishonmang uni
Qalbin har kun alam tig'laydi
Lek yig'lamas unitmang shuni
U o'rniga samo yig'laydi
Yaqinlari yodga tushganda
Ba'zan bir oz ho'rsinib qo'yar
Yuragida mehri toshganda
Muhabbatning bag'rini o'yar
Kun sanaydi, o'tmaydi vaqt ham
Lekin umri o'tar seldayin
Ishonadi keladi baxt ham
Visol kelar mayin yeldayin
Azizlarim vatan qadrini
Olislarda yurgandan so'rang
Ayriliqning achchiq jabrini
Har kun ming bor to'laydi qarang...
...o'z ijodimdan.. . 28.06.2016.
Sanjarbek Jo'rayev
Qaldirg'ochdan mening nima farqim bor
Rizqim terib har yon yuribman daydib
Ketdim olislarga kelganda bahor
Qaldirg'och ketganda boraman qaytib
Lekin afsus mening yo'qdir qanotim
Uchib borar edim uyimga shu on
Yurtim yozin ko'rmay o'tar hayotim
Hamrohim yomg'ir-u, sirdoshim o'rmon
Ayriliq o'tidan qalbim hokisor
Yuribman qalamga dardimni aytib
Meni sog'inganlar kutmang intizor
Qaldirg'och ketganda boraman qaytib
Sanjarbek Jo'rayev 24.06.2017
Quyoshi qizg'anchiq yurtlarda sarson
Yuribman yomg'irga yuragim yuvib
Balki dardim sizga tuyilar oson
Lekin men kundan kun boryapman sovib
Ayriliqda o'tgan mahzun kunlarim
Ko'p erur daraxtning yaproqlaridan
Oyga oromimni sotib tunlarim
Yig'lar musofirlik qiynoqlaridan
Yana kuz keldiyu o'rtandi ko'nglim
Boy berib boryapman umrim yozini
Menga hammadan ham intizor singlim
Sog'indim singlimning gul ovozini
Suyanganim sovuq sibir shamoli
She'rlarimni faqat unga aytaman
Sevganim eh endi o'zga ayoli
Uni unitganda uyga qaytaman
...Sanjarbek Jo'rayev... 04.09.2016.