Андрэй Хадановіч
Сяду за стол цьвярозым,
стану пісаць лісты:
Санта зь Дзедам-Марозам,
Зюзя й Мікола Сьвяты!
Хай ні дачку, ні жонку
шчасьце не абміне –
прыйдзе знутры і звонку,
і крыху – ад мяне.
Дайце пісьменьніку сьвята
з кніжкаю і казой,
цыніку – вершы бяз мату
з радасьцю і сьлязой.
Тэлевізару – сорам,
хай гэту ноч адпачне.
Неба – калядным зорам.
...І чагось для мяне.
Хай усьміхнецца ўдача
ворагам і сябрам,
кожны – сьмяецца й плача,
храмаў хапае і крам.
Хлопца – кожнай дзяўчыне,
а не захоча – дык не,
незалежнасьць – краіне.
...І чагось для мяне.
Зюзя зь Дзедам-Марозам,
Санта зь Міколам Сьвятым!
Трохі сэрца і розуму
дайце гэтым і тым.
Хай ні далёкіх, ні блізкіх
больш не заб’юць на вайне.
...Ёлку ў сьвяточных блісках.
...І чагось для мяне.
Присоединяйтесь к ОК, чтобы подписаться на группу и комментировать публикации.
Нет комментариев