📰🍂🍁 Газетнан уномерыштыже лудаш темлена:

✅Шернур район Кугэҥер ял шотан илем кундемыште илыше-влак ямдым огыт вучо, тӱшка пашалан шкеак пижыт. Нуным старосто-шамыч кумылаҥдат. Тыге пытартыш жапыште тыште кундемым тӱзатыме, тудым илаш йӧнанракым ыштыме шотышто ятыр пашам шуктымо. Ял администраций калыкын йодмыжым кузе шукта, тыгодым могай йӧным кучылтеш, мом эн ончыч шотыш налеш? Тидын нерген администраций вуйлатыше Надежда Борисова дене "Ял илыш" лаштыкыште мутланена.
✅Шыже эрдене Шернур Койсола школ мыйым ик йӱк-йӱан деч посна вашлие: урок кайыме жап. Таче кундемнан ик эн тошто тунемме верже кузе ила, кызытсе илышын йодмашыжлан келшыше шинчымашым налаш йоча-влакын йӧнышт могай? Тиде да моло нерген 90-ше ийла гычак ты школышто тыршыше, а 2012 ий гыч школ директорын пашажым шуктышо Наталья Вершинина дене мутым вашталтышна. Кумданрак – «Шулдырдымо йочам вашлийына – шулдыраҥшым ужатена» материалыште.
✅Кугу Ачамланде сар тӱҥалмек, Йошкар-Оласе медицине колледжын шуко выпускникше фронтышко шке кумылын каен. Нунын кокла гыч иктыже – Зинаида Хитрова. Умбакыже "Нигӧ ок мондалт, нимо ок мондалт" лаштыкыште лудса.
✅У Торъял посёлкышто илыше, ӱмыржӧ мучко бухгалтерлан ыштыше Людмила Петрован йокрокланаш жапше йӧршынат уке. Тудо кидпашамат ышта, верысе ансамбльышкат коштеш. Чыла тидын нерген радамлынрак "Чолгалык" лаштыкыште каласкалена.
✅Морко кундем Уилем ялын ушан-шотан эргыже, марий калыкын талантан да келге тӱняумылымашан шочшыжо, Марий Эл искусствын сулло деятельже, М.Шкетан лӱмеш Марий национальный драме театрын художественный вуйлатышыже, уста режиссёр Василий Пектеев дене курымешлан чеверласымылан нылле кечат эртыш. Тудын нерген поро шомакым йолташыже, родо-тукымжо, коллегыже, тудым сайын палыше-влак "Шарнымаш сорта" лаштыкыште ойлат.