Марий Эл Кугыжаныш Погын председательын икымше алмаштышыже, Российысе марий-влакын федеральный калыкле-тӱвыра автономийыштын советшым вуйлатыше, Российысе калык-влакын ассамблейыштын регионысо пӧлкажын председательже Лариса Яковлева РФ президент пеленысе Наций-влак кокласе кыл шотышто советын заседанийыштыже участвоватлен.

Кремльыште эртыше вашлиймаште Владимир Путин лийын.
Элнан президентше советын йыжыҥъеҥже-шамычлан калык-влак коклаште икойлыкым арален кодаш тыршыме пашаштлан тауштен, тыгак калык ден религий-шамыч коклаште тушманле койышым ылыжташ тӧчымӧ чыла татым жапыштыже кораҥдаш кӱлмым палемден.
Владимир Путин тыгак элысе кажне калыкын тӱвыражым, йӱлажым да йылмыжым арален кодымо йодышлан тӱткышым ойырен, тидым Российысе национальный политикын тӱҥ негызше семын аклен, тыгак 2026 ийым Российысе калык-влакын икоян улмо идалыкышт семын увертараш темлыме дене келшен.
«Президент дене вашлийын мутланымаш калык-влак кокласе кыл аланыште шуктымо пашанан кугыжанышлан кӱлмыжым пеҥгыдемдыш. Элым вуйлатышын да коллегем-влакын темлымашышт ден ой-каҥашыштым национальный политикын стратегийжым угыч тӧрлатен ямдылыме годым, мутат уке, шотыш налыт. Тушто национальный политикым илышыш пуртымаште регион-влакын верышт ден ответственностьыштым кугемдымым кӱлешанлан шотлем», – заседаний нерген шке шонымашыжым каласен Лариса Яковлева.
Марий Эл Кугыжаныш Погынын фотожо.