КАЛСАМ ДЕЙМИН

Сезимде муңдуу обон созолонгон,
Көөдөнгө нечендеген ойлор толгон.
Алышып баш ийбестен тагдыр менен,
Уктабай кээ бир түнү таңды тосом.
Көз албай терезени телмиремин,
Санаага батып жүрөк эзилемин.
Окуса жүрөктөрдөн орун табар,
Канаттуу саптан турган ыр издеймин.
Умтулуп алга карай оолугамын,
Сезбестен кээде жүрөк ооруганын.
Узакка жүрсөм экен унутулбай,
Ыр менен жүрөгүндө окурмандын.
Ордумду ыр дүйнөдөн тапсам деймин,
Жаңылбай ыр жолунда бассам деймин.
Кылымга унутулбай дастан болоор,
Көңүлгө толгон ырлар жазсам деймин.
Өтсөм да бул өмүрдөн унутулбай,
Окурман жүрөгүндө калсам деймин.
Жазган: Жыргалбек Усенов. 22.10.2025.
03:29. Москва