АЛАЙЛЫК КЫЗ

Козголтуп жүрөк дартын,
Суктантып ойго салдың.
Кантемин таппай турам,
Аргасын курган жандын.
Эсимден бүт тандырды,
Ашыктык ыр жаздырды,
Бир кызы Курманжандын.
Булаксыз кайнап турган,
Булбулсуз сайрап турган,
Алайдын гүлдөрүндөй,
Азгырып арбап турган.
Каратпайт өзүңүзгө,
Супсулуу жүзүңөзгө,
Көзүңүз жайнап турган.
Ойлор көп менде сансыз,
Асылкеч сулуу жансыз.
Кээ бирде сырдуу сүйлөп,
Сүрдөнтүп уялтасыз.
Сездирет жылуулукту,
Өзүнчө сулуулукту,
Беттеги уячаңыз.
Перидей жаралыпсыз,
Нур болуп таралыпсыз.
Кол жетпес бийиктеги,
Жылдызга жанашыпсыз.
Айтылбас сырым болдуң,
Сүйүү эмес ырым болдуң,
Аман бол Алайлык кыз....
Жазган: Жыргалбек Усенов. 21.10.2025.
14:33. Москва