Фильтр
Все темыдобавлена вчера в 12:25
добавлена 17 апреля в 21:15
добавлена 10 апреля в 12:50
00:38
загрузка
Показать ещёЛевая колонка
У ААТ «АграБаравінка» прайшоў гадавы сход акцыянераў, на якім прысутнічалі старшыня райкама прафсаюза работнікаў АПК Вольга Пусянкова, галоўны спецыяліст райсельгасхарчу Вольга Міляк.
Адкрыў сход в. а. дырэктара ААТ «АграБаравінка» Віталь Уогінтас. Ён агучыў некаторыя паказчыкі, якія жадалі быць лепшымі і задаў усім акцыянерам пытанні: «Што трэба зрабіць, каб працаваць лепш, каб была аддача і добры вынік?». У пераважнай большасці гэта залежыць ад саміх людзей, іх сумленнасці і адносінаў да работы.
Грунтоўны аналіз вынікаў работы за мінулы год зрабіла галоўны эканаміст гаспадаркі Анастасія Дубіна. Яна расказала, што летась гаспадарка на адну ўмоўную галаву нарыхтавала 32,5 ц. к. адз., што на 14% больш адпаведнага перыяду 2021 года (кармамі нават дзяліліся з іншымі гаспадаркамі раёна). Разам з гэтым вытворчасць валавой прадукцыі ў супастаўных цэнах 2022 года склала 91,1% да мінулагодняга ўзроўню пры заданні 106,5%. І асноўны мінус – ад жывёлагадоўчай галіны. Здаецца, кармы ёсць, работнікі на фермах таксама, а вытворчасць малака, ад якога, дарэчы, асноўны даход гаспадаркі зімой, жадае быць лепшым. Так, у 2022 годзе валавы надой склаў 1890 тон, што на 108 тон менш узроўню мінулага года. Прадалі дзяржаве 1483 тоны малака, што на 200 тон менш 2021 года. Сортам «экстра» рэалізавана 30% ад агульнага аб’ёму рэалізацыі, што на 38% тон менш мінулага года. У сувязі з тым, што валавы надой і гатункавасць малака знізіліся, гаспадарка недаатрымала 645 тысяч рублёў. А гэтыя грошы маглі б пайсці на павышэнне заробку, на прэміі лепшым работнікам, на набыццё неабходных запчастак. Згубілі грошы сельгаспрадпрыемства, значыць, згубілі і свае ўласныя матэрыяльныя даплаты. Анастасія Дубіна падрыхтавала падрабязны аналіз за год па кожнай з фермаў гаспадаркі. І ніводная з іх не паказала рэнтабельную вытворчасць, усюды былі мінусавыя надоі і прывагі ў параўнанні з папярэднім годам. Хаця працаваць ёсць з чым: у гаспадарцы нядрэнныя першацёлкі.
Які выхад з сітуацыі? Перш за ўсё варта перагледзець свае адносіны да непасрэдных абавязкаў самім работнікам акцыянернага таварыства. Пра гэта гаварыў не толькі кіраўнік гаспадаркі, але і галоўны заатэхнік Ігар Долгі, загадчык майстэрні Дзмітрый Панкевіч. «Трэба пачынаць са строгай дысцыпліны, – выказала свой пункт погляду начальнік участка Аляксандр Міраненка. – Бо неўзабаве чакае сур’ёзная работа: нам трэба ўзараць 457 га пад зерневыя, 148 га пад рапс».
Старшыня райкама прафсаюза работнікаў АПК Вольга Пусянкова парэкамендавала кіраўніцтву гаспадаркі пераняць вопыт кіраўніка ААТ «Ляжні» Аляксандры Папіны, чыю гаспадарку можна ставіць у прыклад і па жывёлагадоўчай галіне, і па поспехах у раслінаводстве.
На сходзе атрымалася жывая і надзённая размова. Абмеркавалі планы на будучую пасяўную, выган жывёлы на пашу. Дарэчы, дзеля апошняга пойдуць на эксперымент: возьмуць на сезон работнікаў з Брэстчыны пастухамі, якія гатовы працаваць сумленна. Калі будуць вынікі ў рабоце, магчыма, у далейшым ім давераць і поўнасцю адну з фермаў. Толькі што тады будуць рабіць мясцовыя людзі? Самы час задумацца: ці самім працаваць сумленна, ці аддаць сваю работу ў больш працавітыя рукі.
Нет комментариев