КҮҢЕЛЕМ МОҢНАРЫ

Китмә сөю...Китмә...Язларым бул
Шомырт исләренә исерим
Яшьлектәге тәүге сөю төсле
Тагын яңа хисләр кичерим.
Китмә сөю...Сихри моңым булып
Кошлар сайравына кушыл син
Чык тамчылы язгы гөлләр булып
Таңнарымда, әйдә, ачыл син.
Китмә сөю...Китмә... Җан-тәнемне
Ләйсән яңгыр булып сафландыр
Һәрбер таҗын сөю-назга төреп
Сөю гөлләремне шатландыр.
Ак чәчәкләр кебек ап-ак хисләр
Биләп алсын әле күңелне
Хуш исләре җан-тәнемә күчсен
Яшәрт... Яшьнәт йөрәк кылымны.
Китмә сөю...Китмә күңелемнән
Сөюсез мин - ике канатсыз
Яши алмам... Яши алмамдыр мин
Язсыз, назсыз hәм дә сөюсез.
Рүзилә Гатауллина

Көт Син мине... Көт Син...Мин кайтырмын
Алмагачлар чәчкә атканда
Ак чәчәкләр кебек ак күлмәктән
Очрашырбыз әле Таңнарда.
Әгәр инде Язын кайталмасам
Көт Син мине ямьле Җәйләрдә
Бер йөрербез...Бер йөрербез әле
Җиләк җыеп икәү җәйләүдә.
Җәйләрен дә көтеп алалмасаң
Мин кайтырмын алтын Көзләрдә.
Сагышыңны Синең таратырмын
Гашыйк итеп көзге гөлләргә.
Көзләрен дә әгәр юл төшмәсә
Көт Син мине салкын Кышларда.
Мин кайтырмын... Синең белән
Ак бураннар җырын тыңларга....
Бер кайтмасам, бер кайтырмын әле
Көт Син мине...Көт Син! Көт кенә.......
Рүзилә Гатауллина

Яшьлегем эзләрен язлардан эзләдем
Кояшым елмаеп күз кысты
Сез кайда, кайларда....Кайтыгыз язларда
Балачак һәм яшьлек дусларым.
Яшьлегем эзларен гөлләрдән эзләдем
Чәчкәләр елмаеп баш иде
Эх, яшьлек еллары- сез гүя яз гөле
Таҗлары таңнарда коелды
Яшьлегем эзләрен тамчыдан эзләдем
Учыма бер тамчы яшь тамды
Үткәннәр калганнар- эзләмә язлардан
Эзләмә дигәндәй тоелды.
Яшьлегем язларын җырлардан эзләдем
Сихри моң колакта чыңлады
Хыяллар... Уйларым яшьлеккә йөгерде
Тын калып шул моңны тыңладым.
Рүзилә Гатауллина