ლექსები და სახალისო თემები♥ყველაფერი ანუკისათვის♥

♥️♥️♥️♥️♥️♥️♥️♥️♥️♥️♥️

ბევრიც რომ მითხრა - "აღარ მოხვიდე!" მე მაინც მოვალ, მე მაინც გნახავ, ძვირფასო, ჩემი გახდები ვიდრე, ძვირფასო, ჩემად დაგსახე რახან. რამდენს მეტს მეტყვი - "აღარ მოხვიდე", მე უფრო ხშირად მოვალ და გნახავ. შენთან მოსასვლელ გზებს ვეძებ ახალს, დავდივარ შენი სარკმელის ახლო. რატომ არ გინდა შენ ჩემი ნახვა, როდესაც უკვე ჩემს გულში სახლობ?! რა ვუყოთ, თუკი არა ხარ ჩემი, მე მაინც უნდა სულ ჩემად გსახო. იმედის სხივებს, გულში შერჩენილს, განსაწირავად ხელი არ ახლო. თუმც მართალია, მიმზერ შორიდან და თანაც მიმზერ კუშტად და ცერად, მე მაინც უნდა ახლო მოვიდე, უკვე ვერასგზით ვერ დაგთმობ, ვერა! უნდა გიყურო, გიყურო დიდხანს, როდესაც ირგვლივ აპრილი ჰყვავის და შენ, თუ გინდა, სიტყვაც არ მითხრა, მე სიყვარულზე გიგალობ მაინც. და აფეთქებულს გიჩვენებ ბორცვებს, გეტყვი, - დრო არის სილაღის, ღელვის. გეტყვი და... მერე მაინც გაკოცებ, თუგინდ თვალებზე მოგადგეს ცრემლი.

♥️🌹♥️🌹♥️🌹♥️🌹♥️🌹♥️

ასეა💯💯💯

მე ისეთ ქართველს რა ვუთხრა! მოსწავლეთა ზამთრის არდადეგებზე ბაკუარიანის პიონერთა ბანაკში მოვხვდი. იქ ვნახე ქართველი პიონერები, რომლებმაც სიტყვაც კი არ იცოდნენ ქართული. ეს ჩემი ლექსი, ბავშვებო, არც შემოდგომას ეხება, არც სურათია ზამთრისა, არც გაზაფხულის შექება. ეს ლექსი გახლავთ აუგი - მე გამოვდივარ ძაგებით იმ თქვენი თანატოლების, იმ თქვენი ამხანაგების, საუბედუროდ, რომელნიც ისე აღზრდილნი არიან, ქართულად ხმას ვერ იღებენ, რუსულად – გაგიხარია! რუსულის ცოდნა, იცოცხლე, სახარბიელო რამ არი, მაგრამ ეს უნდა იცოდე - მშობლიურია მთავარი. ენა არ გაწყენს არც ერთი, უნდა იცოდე რამდენიც; ოღონდ არ უნდა დაჰკარგო ქართული სიტყვის ნათელი! მე ისეთ ქართველს რა ვუთხრა, რა ვუთხრა ისეთ ამხანაგს, ვინც ვერ ახერხებს ქართულად წერას, კითხვას და ლაპარაკს. ვინც არც იცის და არც უნდა იცოდეს ჩვენი წარსული; ვინც ხმას ვერ იღებს ქართულად, არც სხვისი ესმის ქართული. განა იმისთვის იბრძოდნენ წარსულში მამა-პაპანი - დღეს შვილმა აღარ იცოდეს სისხლით დაცული ანბანი?! თუკი წინაპარს შანთებით ვერ დაავიწყეს ქართული, თუ დღესაც მღერის ქართველი ფერეიდანში ფანდურით, შენ აქ რა ღმერთი გაგიწყრა, ვინ იყო შენი გამზრდელი, შენი გულისთვის დამიწდა როცა ამდენი ქართველი?! მე ისეთ ქართველს რა ვუთხრა, რა ვუთხრა ისეთ ამხანაგს, ვინც ვერ ახერხებს ქართულად წერას, კითხვას და ლაპარაკს.