Ҳали вояга етмай туриб,

Жисми тошиб, қалби жўш уриб,
Оқ либос киймай висол кўриб,
Эр қўйнига шошилган қизлар.
Қаён борсанг йўлингда устун,
Калта юпка усти ҳам юпун,
Бировларнинг ҳожати учун,
Дебочада кутилган қизлар.
Макр ҳукм қилса устидан,
Алданиб сеҳру жодусидан,
Қийнамасин деб номусидан,
Эрта кунда қутилган қизлар.
Аввал фаҳшга қилар чорани,
Сўнг бировга бериб порани,
Қайтиб келиб бир бечорани,
Тақдирига битилган қизлар.
Ҳаром пулдан тақинса зирак,
Кўриб ота парвойи фалак,
Нафс йўлида сўралган тилак,
Ботқогига ботилган қизлар.
Қушдек учар қайтар уяга,
Гул баданин суртиб куяга,
Бири Tуркия, бири Рассияга,
Седанадек сочилган қизлар.
Бири ичар, бошқаси банги,
Жанжалда ҳам кўринди ранги,
Фасодчилар бобида янги,
Бўй таратиб очилган қизлар.
Фарзанди йўқ юз эрдан қолган,
Ҳар не қизни изнига солган,
Жаҳаннамга йўлланма олган,
Янгасига тутилган қизлар.
Фасодчилар қўлида сарсон,
Шу йўсинда ҳаёти яксон,
Увол қилиб қадрини арзон,
Бир тийинга сотилган қизлар.
Бу шеър бўлсин қизларга ибрат,
Арзон сотманг қадрингиз қиймат,
Минг мақталиб охир оқибат,
Гуноҳкор деб топилган қизлар.