Па словах беларускіх навукоўцаў, калі ў бліжэйшы час захаваецца сухое надвор'е, то ўзровень вады ў рэках краіны можа наблізіцца да мінімальных значэнняў за ўсю гісторыю метэаназіранняў.

Летняя засуха, сухая восень, бясснежная зіма і сціплая на ападкі вясна прывялі да сур’ёзнага абмялення рэк і вадаёмаў. Эксперты, якія назіраюць за паводзінамі ракі Прыпяць дзесяцігоддзямі, не ўзгадаюць і года, каб яна хоць раз заставалася ў сваіх межах. І падобная сітуацыя адбываецца не толькі на Палессі, а па ўсёй краіне.
Па інфармацыі Белгідрамета, па стане на 15 мая спад узроўня вады з інтэнсіўнасцю 1-8 сантыметраў за суткі назіраецца на Дняпры, Бярэзіне, Сожы, Прыпяці, большай частцы Заходняй Дзвіны, асобных участках Віліі і Нёмана. 13-14 мая на Сожы каля Слаўгарада ўзровень вады апусціўся ніжэй адзнакі, якая лімітуе суднаходства, а на Дняпры ў Жлобіне ён ужо дасягнуў яе.
Загадчык лабараторыі аптымізацыі экасістэм Палескага аграрна-экалагічнага інстытута НАН Беларусі Віктар Дзямянчык адзначае, што засуха моцна абмежавала кармавую базу буйных жывёл.
«Таму яны рушылі да населеных пунктаў. Трэба чакаць лясных “прышэльцаў”. Напрыклад, лісаў, янотападобных сабак, рэптылій, якія адчуваюць вельмі вялікі дэфіцыт вільгаці. Таму гэты сезон будзе, вядома ж, выпрабаваннем для нашай занальнай прыроды», – папярэджвае Віктар.
Крыніцы: https://ctv.by/news/obshestvo/rekordnoe-obmelenie-rek-v-belarusi-kak-otsutstvie-pavodka-skazhetsya-na-rybhozah-i-agrariyah , https://pogoda.by/observation/hydrology/