Ваштар серышым лудеш

Уэш октябрь, паркыш толын,
Лышташым кӱрыштын коштеш.
Ваштар йӧршеш чарашке кодын,
Шога да йӱк лукде туртеш.
Мотор парк йӧршынак весеме,
Аллей олмеш - укшер гына.
Коеш укшер иероглиф семын -
Ала-мом возымо тынар?
Возен, а авторжо - той шыже -
Пален, лудаш гына ок лий:
Ала тыге ойлалтын шыде?
Ала кугорныш вочшо ший?
Ала йӧратымашын йӱкшӧ
Укшер лоҥгаште йоҥгалтеш?
Ала каваш кынелше йӱксӧ
Саламым шыже деч налеш?
Уэш октябрь, паркыш толын,
Лышташым кӱрыштын коштеш.
Ваштар гына, чиемде кодын,
Мом возымо - пален налеш.
Анисимов Э.В. Лышташ пӧрдем.
Почеламут-влак. - Йошкар-Ола.
Марий книга савыктыш, 2008 ий