Стәрлебаш районынан махсус хәрби операциянан ялға ҡайтҡан “Марсик” позывнойлы яугир менән уның тыуған яҡтарында күрештек.

Төплө егет икәне күренеп тора, үҙе тураһында ла артыҡ һөйләп бармай.
Өс йыл махсус хәрби операцияла булыуы осоронда алты тапҡыр ялға ҡайтып өлгөргән. Унда уға бик яуаплы бурыс йөкмәтелгән, “Марсик” ҡоралланыу буйынса командир ярҙамсыһы.
–Был ваҡыт эсендә яҡшы итеп ҡорал менән мөғәлләмә итергә өйрәндем.Ҡоралды һүтеп, ундағы төҙөкһөҙлөктө таба һәм йүнәтеп йыя беләм. Был бурысым миңә бик оҡшай, – тип һөйләп алып китте һалдат.
Йәштән уның һөнәре техника менән бәйле. Тәүҙә Стәрлебаш ауылындағы 107-се һөнәрселек училищеһында тракторсы-машинист һөнәренә белем ала. Уны тамамлағас, әрме сафтарына саҡырыла. Адыгея республикаһында 33-сө тау разведкалау бригадаһында, БТР водителе булып хеҙмәт итә. Йәштән спорт менән шөғөлләнгән ауыл егетенә һалдат хеҙмәтен үтеү бер ниндәй ауырлыҡ тыуҙырмай.
Һуңынан хеҙмәт юлын Себер тарафтарында дауам итә. Каток машинисы булып эшләй. Тәжрибә тупланғас, уға ҡеүәтлерәк техника йөрөтөү бурысы ҡуйыла. Чукотка тарафтарында “Байым” тау байыҡтырыу комбинатында ауыр тау төҙөлөшө техникаһы инструкторы булып эшләй. Эшенең төбөнә төшөп бик яратып башҡара ул уны.
Махсус хәрби операцияға барырға повестканы ул Стәрлебашҡа ялға ҡайтҡан мәлендә ала. Тиҙ генә йыйынып Пензаға күнекмәләргә юллана.
–Махсус хәрби операцияға барыуымды тормошомдоң яңы кимәле тип ҡабул иттем. Уны мин лайыҡлы үтергә тейешмен. Махсус хәрби операция минең холҡомдо ла үҙгәртте. Етдилек өҫтәне, һәр һүҙҙе уйлап һөйләргә өйрәтте. Үҙем тыныс ҡабул итһәм дә, яҡындарым минең китеүем ауыр булды. Хеҙмәт иткән еремдә яҡташтарҙың бер-береһенә ярҙам итеү күренеше көслө. Учениенан һуң Стәрлебаш егеттәре бер тирәлә булырға тырыштыҡ. Махсус хәрби операция биләмәһенә барғанда ла шуға еңелерәк булды, – тип һөйләне яугир.
Яҡташтарынан гуманитар ярҙам алыуға ла рәхмәтле “Марсик”.
–Райондаштарҙан нимә һорайбыҙ, барыһын да тиҙ арала әҙерләп ебәрәләр. Бөтә подразделение менән файҙаһын күрәбеҙ. Ошондай терәк булыуы беҙҙең хеҙмәтте еңеләйтә, – тип өҫтәне.
Тыуған яҡҡа ялға ҡайтҡанда әллә күпме эш башҡарып, күңеленә көс алып китә ул. Әле ҡайтҡанында мәрхүм әсәһенең ҡәберенә һәйкәл ташы ҡуйған. Ҡәҙерлеһе тураһында яҡты иҫтәлекте һәр ваҡыт йөрәгендә һаҡлай. Махсус хәрби операция тамаманып, еңеү менән тыуған яҡтарға ҡайтҡас, атаһы йәшәгән тыуған йортон да матурлап төҙөкләргә тигән ниәте бар. Ҡатыны, улы, туғандары, тыуған ере Стәрлебаш егетенең иҫән-имен әйләнеп ҡайтыуын көтә.
–Тормоштоң, яҡындарығыҙҙың ҡәҙерен белеп йәшәгеҙ, – тигән теләктәрен дә еткерҙе “Марсик”
Автор фотоһы.
Стәрлебаш районы.