“Депутат” яуҙа ла һынатмай

Шишмә районынан “Депутат” позывнойлы яугирҙе тыуған яғында сираттағы ялға ҡайтҡан мәлендә тап иттек. 31-се “Башҡортостан” полкында Даян Мурзин исемендәге 1-се батальонда хеҙмәт иткән яҡташыбыҙ былтыр көҙөн махсус хәрби операцияға юллана. Уға 60 йәш бирмәҫһең дә, һәр хәрәкәтендә теүәллек, һәр һүҙендә аныҡлыҡ, яуаплылыҡ сағыла. Хәрби тормошҡа тулыһынса өйрәнеп бөткәне әллә ҡайҙан күренеп тора. Йәш сағында 1983-1985 йылдарҙа армияла ракета-йыһан ғәскәрҙәрендә һалдат бурысын үтеүе лә уға әҙерлектә еңеллек бирә. Унан ул сержант дәрәжәһендә ҡайта.
– Тәүҙә һалдаттарға гуманитар ярҙам ойоштороп йөрөнөм. Һуңынан үҙем дә унда барырға ҡарар иттем. Тормош тәжрибәм менән йәштәргә ярҙам иткем, терәк булғым килде. Яҡындарым минең теләгемә ҡаршы төшмәне. Тыныс тормошта ауыл Советы депутаты булып эшләгәс, унда барғас позывнойымды “Депутат” тип алдым. Тормош тәжрибәһе булғас, беҙҙе бер ниндәй ҙә ауырлыҡтар ҡурҡытмай. Иң ауыры – хеҙмәттәштәреңде юғалтыу. Барыбыҙ ҙа унда бер бурысты башҡарабыҙ, шуға ла бер туғандар һымаҡ яҡын кешеләргә әйләнәбеҙ. Һәр ваҡыт бер-беребеҙгә терәкбеҙ.
Башҡортостандан, Шишмә районынан, башҡа төбәктәрҙән гуманитар ярҙам килеп тора. Республикабыҙ Башлығы Радий Хәбиров үҙе лә килә. Башҡортостандан ярҙам булмаһа, бик ауыр булыр ине. Мәктәп уҡыусыларының хаттарын алып торабыҙ. Уларҙы уҡыу үҙе кинәнес, күңелгә көс бирә, – тине яугир.
Ялға икенсе тапҡыр ҡайтҡан. Ҡайҙа ғына булһаң да, тыуған ерҙең тартыу көсө ныҡ шул.
– Тыуған ерҙең һыуы ла, һауаһы ла тәмлерәк. Ул хистәрҙе һүҙ менән генә аңлатып булмай. Яҡындарым да һағынып көтөп тора, – ти яугир был хаҡта.
– Беҙ күргәнде йәш быуын күрмәһен, именлектә йәшәһендәр. Киләһе көндәребеҙ тыныс булһын, – тигән иң ҙур теләктәрен дә еткерҙе.
Еңеүгә ышаныс көслө яугирҙә. Ошо маҡсат уны йәнә махсус хәрби операцияға әйҙәй.
Р. Шәңгәрәева.
Автор фотоһы.